تجربتى مع القراءة

فى مثل هذا الوقت من كام سنة كنت بقرأ تراب الماس والجزار و 313 وشبيهاتها فقط ، وكنت فخور جدًا بكده ، وكان فى قرّاء أكثـر خبـرة منى بيتريقـوا عليّا من جوّاهم لأنى بقـرأ حاجات خفيفة ، أو تافهة ، زى دى ، لكن مبيصرّحوش بكده خالص احترامًا لرأيى الشخصى ، لكن برضـو فضلوا من جوّاهم زعلانين على مستوى الأدب المستمـر فى الانحـدار وواخد فى طريقه مستوى الذوق الأدبى العام عنـد معظـم القـراء ..
نصحـونى ونصحوا المبتدئين من أمثالى كتيـر ، لكن من إمتى النصيحة بتجيب نتيجة يعنى ؟ ..
الخلاصة إننا فضلنا زى ما إحنا .. عشنا فتـرة من الضحالة لا بأس بهـا لحـد ما بدأنا ننضج فعلًا ..
فترة إنك تكون شخص بتقرأ جديد هى أسعد فترات القراءة اللى هتمّر بيها .. بتكون فيها شخص سهل الإرضـاء وبتقبل كل ما يُعرض عليك من روايات وبتستمتع بيها جدًا .. الاختيارات لامحدودة والأمـور بسيطة ، بالإضافة لنشـوة التجربة الجديدة .. ومفيش مانع ، من كل وقت للتانى ، تقرأ رواية تقيلة أو مكثفة شوية كنوع من التظاهر بالخبـرة ..
مع الوقت بتنهى كل الروايات الأكثر صيتًا حواليك ، وبيبدأ ذوقك يتجه فى ناحية معينة ، وبيكون صعب إرضاءك جدًا .. خياراتك بتقل ، وروايات قليلة بس اللى بتقدملك جرعة المتعة اللى بتحتاجهـا .. بتتشمم المحيط بتاعك عن كاتب جديد ، بتبدأ تبص للأمـور بمفهوم أوسع ، مش بتكتفى بالكاتب المحلّى اللى تعرفه ، لأ بتدوّر على كتّاب عالميين ، وكتّاب قُدام .. أصحاب نوبل وأصحاب الروايات الأكثـر مبيعًا فى العالم ..
المرحلة الجاية هى مرحلة (البحث عن النادر) ، والمرحلة دى زى ما هو باين من اسمها ، بتبدأ تدوّر فيها عن الروايات والكتب الأكثـر ندرة .. إنت دلوقتى قارئ مخضرم من الدرجة الأولى .. خلاص خلّصت كل ما يتحدث عنه القراء من روايات وكتب وبتبحث عن جديد .. وصلت إمكانية إرضاءك إلى درجة تقارب المستحيل .. بتحس بالاختناق لأنك مش لاقى اللى فى الكتب بيتطبق حواليك .. كل اللى بيتقال حواليك بقى شئ تافه ، لا يثير بداخلك إلا الكآبة والرغبة فى الانتحـار .. بتحتقـر أذواق الناس فى القراءة ، وبخاصة قراء المرحلة الأولى أو القراء الجُدد ..

المراحل دى هيمر بيها أى شخص بيحب القراءة فعلا ومش بيقرأ لمجرد الموضة ، لأن النوع ده من القرّاء ، قُرّاء الموضة ، هيزهقوا بسرعة وهيسيبوا القراءة عاجلًا أو آجلًا ..

الرسالة هنا للقرّاء المخضرمين .. لا تصرّح أبدًا بكرهك لذوق الناس أو لأنواع الكتب والروايات اللى بيقرأوها ، وخليك فاكر إنك عدّى عليك وقت كنت بتقراها وكنت بتضايق من اللى يحقّر من اللى بتقراه ..
ودُمتم ..